لەجەژنی نەورۆزدا مەخموورو ناوچە دەبڕێندراوەکانی دیكه،‌ بەهیوای رۆژێکی نوێن... خەلیل پاڵانی

آذار/مارس 20, 2021
جەژنی نەورۆزو سەری ساڵی کوردی و (26)ەمین ساڵیادی دەمەزراندنی یەکێتی نەتەوەیی دیموکراتی کوردستان YNDK پیرۆزبێت.
لەجەژنی نەورۆزدا مەخموورو ناوچە دەبڕێندراوەکانی تر، بەهیوای رۆژێکی نوێن.
خەلیل پاڵانی - مەخموور
بەهۆی هەڵکەوتەی جوگرافی ناوچەدابڕێندراوەکان، کە هاوتەریبی سنووری ناوچە عەرەبییەکانی عێراقن، هەمیشە کەوتوونەتە بەر پەلاماری بێ بەزەییانەی حکومەتە یەک لەدوای یەکەکانی عێراق و قوربانی ململانێ سیاسییەکانی کورد لەگەڵ یەکتری.
شاری مەخمووریش وەکو یەکێک لەوناوچانە هەرکاتێک دەرفەتێک بۆ هەڵکێشانی هەوای ئازادیی بۆ هاتۆتە پێش، تەمەنی کورت بووەو دووبارە داگیرکراوەتەوە، ئەم بینەو بەردەیەش چەند جارێک دووبارە بۆتەوە، لە راپەڕینی ساڵی 1991دا تەمەنی ئازادی تەنیا (20) رۆژبوو تا ئازادی عێراق و ناوچەکە لەساڵی 2003، ئیتر دەرفەتێکی باش هەبوو بۆ گەڕاندنەوەی شارەکە بۆسەر ئیدارەی رەسەنی خۆی کە ئیدارەی هەولێرە، بەڵام جارێکی تر کرایە قوربانی زیادکردنی دەنگی کورد لەسەر پارێزگای موسڵ، ئیتر لەنێوان دوو ئیدارەی هەولێرو موسڵ بەفەرامۆشکراوی مایەوە.
لەساڵی 2014 و هێرشی داعش دیسان خەڵکەکەی دەربەدەربوون و دواترو دوای سێ رۆژ لەلایەن پێشمەرگەی کوردستانەوە ئازادکرا.
ئەم جارەیان و لەساڵی 2017 بەپیلانێکی ترو بەهۆی ململانێی حیزبی و بەسیاسەتی (بۆمن نەبێ نابێ بۆتۆش بێ)کەوتەوە بەردەستی حەشدو سوپای عێراق و جارێکی تر داگیرکرایەوە.
هەڵبەتە مەترسی گەورە لەوەدایە کە کورد زۆربەیان یەکتری قەبول ناکەن و بۆ بێگانەش لەسەر چۆکن، بۆیە هەمیشە داگیرکەران و ناحەزان دەرفەتی باشیان بۆ دەڕەخسێت و مەرامە گڵاوەکانیان بەئاسانی جێبەجێ دەکەن .
پێویستە لەم کاتە هەستیارەدا کورد نێوماڵی خۆی رێک بخاتەوەو یەکتری قەبول بکەن و هەوڵی پێکهێنانی ئەنجومەنێکی سیاسی بدەن کە تەواوی هێزولایەنە سیاسییەکان لەخۆبگرێ و بەیەکەوە بڕیارە چارەنووسسازەکەن بدەن و پلانی تۆکمەیان هەبێ بۆ پیلانی ناحەزان و داگیرکەران، ئیتر یەکتر بەبچووک سەیر نەکەن و بەچاوی گەورەو پیرۆز نەڕواننە ناحەزانی کوردو کوردستان .
ئێمە لەیەکێتی نەتەوەیی دیموکراتی کوردستان ، چەندین جار جەختمان کردۆتەوە لەسەر پێویستی رێکخستنەوەی نێوماڵی کوردو پێکهێنانی ئەنجومەنی سیاسی کوردستان و رێگە خۆشکردن بۆ بەستنی کۆنگرەی نەتەوەیی ، کە ئەم هەوڵانە دڵنیاییدەری پاراستنی بەرژەوەندییە نیشتمانی و نەتەوەییەکانمان دەدات و دەبێتە چەترێکی بەهێز بۆ رووبەڕووبوونەوەی پیلانی داگیرکەرانی کوردستان و داینەمۆی پێشخستن و بەرەوپێشبردنی وڵاتمان لەهەموو روویکەوە .