میدیا- هه‌ولێر
كۆنگرەی نەتەوەیی كوردستان KNK- كۆمیته‌ی باشوور كۆبوونەوەی خۆی به‌ئاماده‌بوونی ژماره‌یه‌ك له‌ ئه‌ندامان و حزبه‌ سیاسییه‌كان لە هەولێر ساز ده‌كات.
رۆژی شه‌ممه‌ رێكه‌وتی 3/6/2023 به‌ئاماده‌بوونی ژماره‌یه‌ك له‌ ئه‌ندامان و حزبه‌كان، كۆمیته‌ی باشووری كۆنگرەی نەتەوەیی كوردستان (KNK)‌ ‌ له‌ شاری هه‌ولێری باشووری كوردستان كۆبوونه‌وه‌یه‌كیان له‌سه‌ر ره‌وشی سیاسی كوردستان و ناوچه‌كه‌ و جیهان و راگه‌یاندنی كۆمیته‌كانی كار و دیاریكردنی ئه‌ندامان و ئاماده‌كاری بۆ به‌ستنی كۆنگره‌یه‌ك له‌سه‌ر رێككه‌وتننامه‌ی لۆزان ئه‌نجامدا.

له‌كۆبوونه‌وه‌كه‌ هه‌موو لایه‌ك له‌سه‌ر ئه‌وه‌ كۆك بوون كه‌ مه‌ترسی گه‌وره‌ له‌یه‌ن دوژمنان و داگیركه‌رانی كوردستان له‌سه‌ر ئه‌زموونی باشوور و رۆژئاوی وڵات هه‌یه،‌ بۆیه‌ پێویسته‌ هه‌موو لایه‌كمان له‌ ئاست به‌رپرسیارییه‌تیدا بین و له‌سه‌ر مێزی گفتوگۆ چاره‌سه‌ری سه‌رجه‌م كێشه‌كانی نێوان لا‌یه‌نه‌ سیاسییه‌كان بكرێ و سه‌رجه‌م بڕیاره‌كانی دادگای فیدرال له ‌دژی باشووری كوردستان سیاسیین و ‌ بۆ كۆتایی هێننان به‌و ته‌نگژانه‌  پێویسته له‌كاتی دیاریكراو هه‌‌ڵبژاردنێكی پاك و بێگه‌رد بكرێ و په‌رله‌مان ببێته‌وه‌ ده‌نگ و رای خه‌ڵكی كوردستان.

 هه‌روه‌ها له‌كۆبوونه‌وه‌كه‌ ناوی ئه‌ندامانی كۆمسیۆن و كۆمیته‌كان راگه‌ینرا و بڕیادرا هه‌ر كۆمسیۆن و كۆمیته‌یه‌ك دوای كۆبوونه‌وه‌ی ده‌ست به‌كارو چاڵاكی بكات ، هه‌روه‌ها باس له‌ رۆلی KNK كرا بۆ یه‌كێتی نه‌ته‌وه‌یی و نه‌هێشتنی گرژییه‌كان و  فه‌راهه‌مكردنی ئاشته‌وایی و رێكخستنه‌وه‌ی نێوماڵی كوردستان كه‌ ئه‌وه‌ش به‌یه‌كریزی و ته‌بایی سه‌رجه‌م هێز و لایه‌نه‌ سیاسییه‌كان ده‌بێت.

میدیا - هەولێر

مەكتەبی سیاسیی یەكێتی نەتەوەیی دیموكراتی كوردستانYNDK، له‌ شاری هه‌ولێر به‌شداری مه‌راسیمی داگیرساندنی مۆمی (48) ساڵه‌ی دامه‌رزاندنی یه‌كێتی نیشتمانیی كوردستان ده‌كات.

ئێوارەی ئەمڕۆ 1-6-2023، شاندێكی مەكتەبی سیاسیYNDK كه‌ پێكهاتبوو له‌ هەڤاڵان ( د.شاخەوان خالید كارگێڕی مەكتەبی سیاسی و شاكر هاشم ئه‌ندامی سه‌ركردایه‌تی و فاخر نانه‌كه‌لی كارگێڕی مەكتەبی ناوەندی پەیوەندییەكان ئه‌رسه‌لان كاروانی ئەندامی مەكتەبی ناوەندی پەیوەندییەكان) به‌شداری مەراسیمی داگیرساندنی مۆمی 48 ساڵەی تەمەنی یەکێتیی نیشتمانیی کوردستان لە بارەگای مەکتەبی سیاسی یەکێتی لە هەولێر ده‌كه‌ن بە ئامادەبوونی باڵیۆز و کونسوڵ و نێردە و دیپلۆماتکاری وڵاتان و سه‌رۆك و سكرتێری حزبە کوردستانی و عێراقییەکان و نوێنەرانی حکومەت بەڕێوەچوو، کە تیایدا قوباد تاڵەبانی وتاری یەکێتیی نیشتمانیی کوردستانی خوێندەوە و كۆمه‌ڵێك چاڵاكی هونه‌ری و گۆرانی له‌ مه‌راسیمه‌كه‌ پێشكه‌شكران.

شاندی YNDK پیرۆزبایی (48) ساڵه‌ی دامه‌زراندنی یه‌كێتی له‌ به‌رێز قوباد تاڵه‌بانی و ئه‌ندامانی مه‌كته‌بی سیاسی و سه‌ركردایه‌تی یه‌كێتی كرد و به‌م بۆنه‌یه‌وه‌ په‌یامی پیرۆزباییان ئاڕاسته‌كردن، له‌به‌رامبه‌ردا كاك قوباد تاڵه‌بانی و ئه‌ندامانی مه‌كته‌بی سیاسی و په‌یوه‌ندییه‌كانی یه‌كێتی نیشتمانیی كوردستان سوپاسی پیرۆزبایی و به‌شداری شاندی ( YNDK )یان له‌م مه‌راسیمه‌دا‌ كرد، جێگه‌ی ئاماژه‌ پێكردنه‌ مه‌راسیمه‌كه‌ كاتژمێر 6ی ئێواره‌ تا 8:30ی شه‌و به‌رده‌وام بوو.

میدیا - هەولێر

مه‌كته‌بی سیاسی یەکێتى نەتەوەیى دیموکراتى کوردستان YNDKبەبۆنەى (48)ه‌مین ساڵیادى دامەزراندنی یه‌كێتی نیشتمانیی كوردستان په‌یامی پیرۆزباییان ئاڕاسته‌ ده‌كات، له‌ په‌یامه‌كه‌ هیواى سەرکەوتن و پێشڤەچوون بۆ ده‌خوازێ و بۆ ده‌ربازكردنی ئه‌م ره‌وشه‌ داوای ته‌بایی و یه‌كریزی سه‌رجه‌م هێز و لایه‌نه‌ سیاسییه‌كانی كوردستان ده‌كات .

ده‌قی په‌یامی پیرۆزباییه‌كه‌:

بۆ بەڕێز مەكتەبی سیاسیی یەكێتی نیشتمانیی كوردستان

بابەت / په‌یامی پیرۆزبایی

سڵاوی سەرخۆبوون ‌و ئازادی ...

بەبۆنەی( 48 )ه‌مین ساڵیادی دامەزراندنی (یەكێتی نیشتمانیی كوردستان) بەناوی خۆمان ‌و تەواوی ئەندام ‌و لایەنگرانی (یه‌كێتی نه‌ته‌وه‌یی دیموكراتی كوردستان YNDK )، جوانترین پیرۆزباییتان ئاڕاستە دەكەین‌ و خوازیارین ساڵیادی دامەزراندنی ئەمساڵتان هاندەر بێت بۆ ئاشتی و سەقامگیری كوردستان.

بەڕێزان : له‌كاتێكدا كه‌وا یادی دامه‌زراندنی (یه‌كێتی نیشتمانیی كوردستان) ده‌كه‌نه‌وه‌، كوردستان له‌ ره‌وشێكی ناسك و هه‌ستیاردایه‌، بۆ ده‌ربازكردنی ئه‌م ره‌وشه‌ له‌سه‌ر هه‌موو لایه‌كمان پێویسته‌ كار بۆ یەكریزی و تەبایی نێوان سەرجەم هێزو لایەنەكانی كوردستان بكه‌ین و، به‌گیانێكی برایانه‌ تێبكۆشین بۆ چارەسەركردنی كێشە و قەیرانەكان، ئه‌مه‌ش ده‌بێته‌ فاكته‌رێكی گرنگ بۆ بەدیهێنانی تەواوی مافەكانی گەلەكەمان و هەنگاونان بەرەو هه‌ڵبژاردنێكی پاك و روون و پاراستنی دەستكەوتەكانمان.

جارێكی دیكە ساڵیادی دامەزراندنی (ی. ن. ك) پیرۆز بێت و كوردستانیش هەمیشە ئاوەدان و شوێنی پێكەوەژیان و ئاشتی و تەبایی سەرجەم پێكهاتەكانی كوردستان بێت.

هەر سەركەوتوو بن ... لەگەڵ رێزماندا.

مەكتەبی سیاسیی

یەكێتی نەتەوەیی دیموكراتی كوردستان YNDK

1-6-2023

هه‌ولێر- باشووری كوردستان