پەیامى سکرتێرى گشتیى YNDK سەبارەت بە موشەکبارانکردنى هەولێر

شباط/فبراير 16, 2021
- جەماوەرى خۆڕاگرى کوردستان ...
بە ئامانجگرتن و موشەکبارانکردنى هەولێر کارێکى تیرۆریستى ترسنۆکانەو پیلانێکى گڵاوە، تێکدەران ئامانجیان تێکدانى رەوشى ئاسایش و ئارامى کوردستان و هەولێرە، بەتوندترین شێوە موشەکبارانکردنى هەولێر ئیدانەى دەکەین و، هیواى زووچاکبوونەوەش بۆ بریندارەکان دەخوازین.
دوژمنان و ناحەزانى کوردستان دەمێکە لە پیلانگێڕاندان لە دژى کوردستان، بێگومان رووبەڕووبوونەوەى پیلانى گڵاوى دوژمنان و ناحەزان پێویستى بە یەکڕیزى و یەکدەنگى تەواوى لایەنە سیاسییەکان و پێکهاتەکانى گەلى کوردستانە، بۆیە پێویستە بە زووترین کات هەموو لایەکمان کاربکەین بۆ رێکخستنەوەى ناوەندى سیاسى کوردستان، ئەم رەوشەى ئێستاى کوردستان لە هەموو لایەکمان دەخوازێت کەوا بەرژەوەندى نەتەوەیى و نیشتمانى لەبەر چاو بگرین و وەک کوردستانییەک و دوور لە بەرژەوەندى حزبى مامەڵە لەگەڵ رووداوەکاندا بکەین.
ئیمە وەکو یەکێتى نەتەوەیى دیموکراتى کوردستان YNDK دژایەتیى خۆمان بۆ ئەو پیلانانە رادەگەیەنین کە دەیانەوێت ئارامى و ئاسایشى کوردستان تێکبدەن، هەروەها بۆ پاراستنى کوردستان ئامادەى هەر جۆرە هاوکارى و پیشتیوانییەکین لەگەڵ لایەنە پەیوەندیدارەکانى کوردستان.
- سەرکەوێ ئیرادەى هەقخوازانەى گەلى کوردستان .
- مردن و رووڕەشى بۆ دوژمنان و ناحەزانى کوردستان.
غەفوور مەخموورى
سکرتێرى گشتیى
یەکێتى نەتەوەیى دیموکراتى کوردستان YNDK
15 / 2 / 2021