سوپاسنامەیەک لە سکرتێرى گشتیى یەکێتى نەتەوەیى دیموکراتى کوردستان YNDK

نيسان/أبريل 01, 2020

میدیا – هەولێر :
 غەفوور مەخموورى سکرتێرى گشتیى یەکێتى نەتەوەیى دیموکراتى کوردستان YNDK ، سوپاسنامەیەکى ئاراستەى هەموو ئەو بەڕێزانە کردووە کەوا یوبیلى زیوینى YNDK یان پیرۆز کردووە، ئەمەش دەقى سوپاسنامەکەیە:

سوپاس و پێزانین

 بەناوی خۆمان و مەكتەبی سیاسی و كۆمیتەی سەركردایەتی و تەواوی ئەندام و دۆست و لایەنگرانمانەوە، سوپاس و رێزو خۆشەویستیمان ئاراستەی هەر هەموو ئەو بەڕێزو ئازیزانە دەكەین ؛ لە حیزب و لایەنە سیاسییەكان و رێكخراوەكانی كۆمەڵگەی مەدەنی و رۆشنبیران و كەسایەتییەكان و كۆنسڵخانە گشتییەكان و هۆزو عەشیرەتەكان و پیاوانی ئایینی و هەموو ئەو بەڕێزانەی کە بە ناردنی پەیامی پیرۆزبایی و پەیوەندی تەلەفۆنی یان لەرێگەی ئیمێل و فەیسبووكەوە لە كوردستان و دەرەوە بەسەریانكردینەوەو، بەبۆنەى یۆبیلى زیوین (25)ەمین ساڵیادى دامەزراندنى یەکێتى نەتەوەیى دیموکراتى کوردستان YNDK ؛ پیرۆزباییان لێكردین، پیرۆزبایى و بەسەركردنەوەتان بەم بۆنەوە زیاتر دڵخۆشی كردین و بووە هۆی ورە بەخشینی زیاتر بۆ كارو خەباتی داهاتوومان.
 هەرچەندە ئێمە دەمانویست لە رێوڕەسمێکى شایستەو تایبەتدا یادى یوبیلى زیوینى YNDK بکەینەوەو لە نزیکەوە لە خزمەت هەموو لایەکتان دابین، بەڵام بەداخەوە بەهۆى بڵاوبوونەوەى پەتاى فیرۆسى کۆرۆنا رێوڕەسمەکەمان هەڵوەشاندەوە، نزا دەکەین یەزدانى مەزن هەموو لایەکمان بپارێزێت و، بە تەندروستییەکى باش ئەم قۆناخە دەرباز بکەین.
 وێڕای سوپاس و پێزانینی دووبارەمان بۆ هەر هەموو لایەك، هیوای پێشڤەچوون و سەركەوتن و سەرفرازیتان دەخوازین. ... لەگەڵ رێزماندا.


      براتان
غەفوور مەخمووری
 سكرتێری گشتیی
 یەكێتی نەتەوەیی دیموكراتی كوردستان YNDK
   1 / 4 / 2020