غەفوور مەخموورى سکرتێرى گشتیى یەکێتى نەتەوەیى دیموکراتى کوردستان YNDK ، لە پەیامێکیدا بۆ بەڕێز سەرۆک مەسعود بارزانى رێبەرى بزاڤى رزگاریخوازى نیشتمانى کوردستان، بەبۆنەى ١٦ ى ئاب ساڵڕۆژى دامەزراندى پارتى دیموکراتى کوردستان، وێڕاى پیرۆزبایى و هیواى تەمەن درێژى و سەرکەوتن خواستن بۆ جەنابیان، ئاماژە بە رۆڵى کاریگەرانى سەرۆک بارزانى بۆ رێکخستنەوەى نێوماڵى کورد دەکات و، لەم پێناوەشدا داواى پێکهێنانى (ئەنجوومەنى باڵاى سیاسیى کوردستان) دەکات. ئەمەش دەقى پەیامەکەیە :

برای بەڕێزمان جەنابی سەرۆک مەسعود بارزانی رێبەری بزاڤی رزگاریخوازی نیشتمانی كوردستان

سڵاوێكی برایانەی گەرم ...
بەناوی خۆمان و مەكتەبی سیاسی و كۆمیتەی سەركردایەتیی یەكێتی نەتەوەیی دیموكراتی كوردستان YNDK، بەبۆنەی رۆژی لەدایكبوونی جەنابتان و (74) هەفتاو چوارەمین ساڵیادی دامەزراندنی پارتی دیموكراتی كوردستان، جوانترین پیرۆزبایی ئاراستەی جەنابتان و بەڕێزان لە مەكتەبی سیاسی و ئەنجوومەنی سەركردایەتی و تەواوی كادرو ئەندامان و جەماوەری PDK دەكەین و هیوای بەردەوامی و پێشڤەچوون و سەركەوتنی زیاترتان بۆ دەخوازین.
بێگومان لەكاتێكدا كە یادی دامەزراندنی (PDK) دەكەینەوە كوردستان و ناوچەكە لە رەوشێكی زۆر ناسك و هەستیاردان و, هەموو رۆژهەڵاتی ناڤین لەبەردەم كۆمەڵێ‌ ئەگەرو پێشهات و گۆڕانكاری مەزندان, بۆ خۆئامادەكردن بۆ ئەم رەوشە پێویستیمان بە رێكخستنەوەی ناوەندی سیاسی كوردستان و یەكڕیزی و یەكدەنگی هەموو لایەنە سیاسییەكان و تەواوی پێكهاتەكانی گەلی كوردستانە, بۆ ئەمەش جەنابتان وەك هەمیشە دەتوانن رۆڵێكی كاریگەر و مەزن ببینن، بە باوەڕى ئێمە پێکهێنانى (ئەنجوومەنى باڵاى سیاسیى کوردستان) دەبێتە فاکتەرێکى بەهێز بۆ یەکڕیزى و یەکدەنگى و رێکخستنەوەى نێوماڵى کوردستان، لەم رووەوە جەنابتان دەتوانن رۆڵى کۆکردنەوەى تەواوى هێزو لایەنەکان ببینن، لەم پێناوەشدا ئێمە وەكو YNDK ئامادەی هەموو جۆرە هاوكاری و پشتوانییەكین.
لەكۆتاییدا؛ هیوای تەمەن درێژى و تەندروستییەکى باش بۆ جەنابتان و پێشڤەچون و سەرکەوتنى زیاتر بۆ PDK دەخوازین و، جەختدەكەینەوە سەر پتەوكردن و پێشڤەبردنی پەیوەندی هاوخەباتى و برایانەی نێوانمان لەپێناو زیاتر خزمەتكردن و پێشڤەبردنی دۆزی رەوای گەلی كوردستان و گەیشتنمان بە مافە رەواكانمان ... لەگەڵ رێزو خۆشەویستى دووبارەماندا .
هەر بژین و سەركەوتووبن بۆ كوردو كوردستان.



براى دڵسۆزتان
غەفوور مەخموورى
سکرتێرى گشتیى
یەکێتى نەتەوەیى دیموکراتى کوردستان YNDK
16 / 8 / 2020

میدیا - هەولێر:
 بەبۆنەی یۆبیلى ئەلماس (75)ەمین ساڵیادی دامەزراندنی حیزبى دێموکراتى کوردستان، سكرتێری گشتیی YNDK پەیامێكی پیرۆزبایی ئاراستەی بەڕێز خالید عەزیزى سکرتێرى گشتیی و ئەندامانى دەفتەرى سیاسیى حیزبی دێموکراتی کوردستان دەكات, وێڕای پیرۆزبایی هیوای سەركەوتنیان بۆ دەخوازێت.
 غەفوور مەخمووری سكرتێری گشتیی یەكێتی نەتەوەیی دیموكراتی كوردستان YNDK بەبۆنەی یۆبیلى ئەلماس (75)ەمین ساڵیادی دامەزراندنی حیزبى دێموکراتى کوردستان, پەیامێكی پیرۆزبایی ئاراستەی بەڕێز خالید عەزیزى سکرتێرى گشتیی حیزبی دێموکراتی کوردستان كردووە, لە پەیامەكەدا وێڕای پیرۆزبایی, جەختدەكاتەوە سەر یەكڕیزی و یەكدەنگی لایەنە سیاسییە كوردستانییەكان لەپێناو زیاتر پێشڤەبردنی دۆزی رەوای گەلی كوردستان, ئەمەش دەقی پەیامەكەیە:

برای بەڕێزمان كاك خالید عەزیزى سکرتێرى گشتیی حیزبی دێموکراتی کوردستان
بەڕێزان ئەندامانی دەفتەرى سیاسیى حیزبی دێموکراتی کوردستان

   سڵاوێكی برایانەى گەرم ...
 بەڕێزان؛ بەناوی خۆمان و ئەندامانى مەكتەبی سیاسی و كۆمیتەی سەركردایەتی و تەواوی هەڤاڵانی یەكێتی نەتەوەیی دیموكراتی كوردستان YNDK، بەبۆنەی (یوبیلى ئەلماس) حەفتاوپێنجەمین ساڵیادى دامەزراندنى حیزبە تێكۆشەرەكەتان (حیزبی دێموکراتی کوردستان) ، جوانترین و گەرمترین پیرۆزبایی ئاراستەی ئێوەی بەڕێزو تەواوى هەڤاڵانى حیزبی دێموکراتی کوردستان دەكەین و، ئومێد دەكەین یوبیلى ئەلماسى حیزبتان ببێتە فاكتەری پێشڤەچوون و خاڵی وەرچەرخان و سەركەوتنی زیاتر لە پێناو خزمەتكردنی دۆزی رەوای گەلەكەمان.
 بەڕێزان؛ یوبیلى ئەلماسى حیزبتان لە كاتێكدایە كەوا كوردستان و رۆژهەڵاتی ناڤین بەشێوەیەكی گشتیی و بەتایبەت رۆژهەڵاتى كوردستان لە رەوشێكی زۆر ناسك و هەستیاردان و چاوەڕوانی هاتنەپێشی كۆمەڵێ‌ ئەگەرو پێشهات و گۆڕانکارى مەزن دەكرێت، بۆیە لەسەر هەموو لایەكمان پێویستە رەچاوى بەرژەوەندى باڵاى نەتەوەیى و نیشتمانى بکەین و لەپێناو یەكێتی و یەكدەنگی كوردان و سوود وەرگرتن لە گۆڕانکارییەکان خەبات بكەین، بێگومان یەکبوون و یەکدەنگیمان کاریگەرترین چەکمانە بۆ رووبەڕووبوونەوەى پیلانى دوژمن و ناحەزانمان، لەهەمان کاتدا كاركردنمان بە ئاراستەى یەکێتى نەتەوەیى بەرەو سەرکەوتن و سەرفیرازیمان دەبات، بەباوەڕی ئێمە لەم پێناوەشدا پێکهێنانى بەرەیەک بۆ هێزەکانى رۆژهەڵاتى کوردستان و بەستنی كۆنگرەیەکی نەتەوەیی سەتاسەرى دەبێتە فاكتەری سەرەكی یەكڕێزیمان، بۆیە پێویستە هەموو لایەكمان لەپێناو ئەم ئامانجەدا تێبكۆشین.
 لەكۆتاییدا؛ دووبارە هیوای سەركەوتنتان بۆ دەخوازین و، سڵاو لە خەبات و بەرخودانی رۆژهەڵاتی كوردستان دەكەین و بەچاوی رێزەوە لێی دەڕوانین و، هیوای پێشڤەچوون و سەركەوتنی زیاتر بۆ خەباتی رۆژهەڵاتى وڵات دەخوازین و، جەختدەكەینەوە سەر پتەوكردن و پێشڤەبردنی پەیوەندی برایانەی نێوانمان لەپێناو زیاتر خزمەتكردن و پێشڤەبردنی دۆزی رەوای گەلی كوردستان و گەیشتنمان بە مافە رەواكانمان ... لەگەڵ سڵاوو رێزى دووبارەماندا .
هەر بژین و سەركەوتووبن بۆ كوردو كوردستان.
                                                                                                                                                                
                                                                                                                براتان
غەفوور مەخموورى
سکرتێرى گشتیى
یەکێتى نەتەوەیى دیموکراتى کوردستان YNDK                       
15 / 8 / 2020

برای بەڕێزمان كاك رێکار ئەحمەد سکرتێرى گشتیى حزبى رزگارى کوردستان

   سڵاوێكی برایانەی گەرم ...
  بەناوی خۆمان و مەكتەبی سیاسی و كۆمیتەی سەركردایەتی یەكێتی نەتەوەیی دیموكراتی كوردستان YNDK، بەبۆنەی (28)ەمین ساڵیادی دامەزراندنی حزبە تێکۆشەرەکەتان (حزبى رزگارى کوردستان)، جوانترین پیرۆزبایی ئاراستەی بەڕێزتان و ئەندامانى مەكتەبی سیاسی و سەركردایەتی و تەواوی كادرو ئەندامانى حزبى رزگارى کوردستان دەكەین و، هیوای سەركەوتنتان بۆ دەخوازین.
 بێگومان لەكاتێكدا كە یادی دامەزراندنی (حزبى رزگارى کوردستان) دەكەنەوە كوردستان و ناوچەكە لە رەوشێكی زۆر ناسك و هەستیاردان, ئەم رەوشە لە هەموو لایەکمان دەخوازێت کەوا یەکدەنگ و یەکڕیزو هاوهەڵوێست بین، بۆیە پێویستە لەم پێناوەدا ئێمەى حزب و لایەنە کوردستانییەکان زیاتر هاوکارو پشتیوانى یەکدی بین و، بە رۆڵى نەتەوەیى و نیشتمانى خۆمان رابین.
 هەر لەم بۆنەیەدا جەختدەكەینەوە سەر پتەوكردنی پەیوەندی هاوخەباتی و برایانەی نێوانمان لەپێناو زیاتر خزمەتكردن و پێشڤەبردنی دۆزی رەوای گەلی كوردستان و هێنانەدی تەواوی مافە رەواكانی.
لەگەڵ رێزو خۆشەویستی دووبارەماندا.


 برای دڵسۆزتان
غەفوور مەخمووری
سكرتێری گشتیی
یەكێتی نەتەوەیی دیموكراتی كوردستان YNDK
15/ 8 / 2020

صدر مؤخرا كتاب (إستقلال كوردستان... الأفكار و التأملات)للسياسي و الكاتب غفور مخموري
الكتاب عبارة عن مجموعة مقالات سياسية و فكرية، وهو قراءة واقعية للاحداث و المستجدات التي وقعت خلال السنوات المنصرمة في كوردستان، المؤلف أشار في اسطر من كتابه الى انه لا شــك فيــه أن إســتقلال كوردســتان هــو عامــل رئيس لترســيخ الأمــن والأســتقرار في االمنطقــة والشرق الأوســط برمته ، مؤكدا ان عــلى البلــدان و أصحاب القرار في العـالم العـربي واالمثقفيـن والـرأي العـام العـربي أن يدركـوا تلــك الحقيقــة وتكــون لهــم قــراءة عصريــة وواقعيــة لقضيـة شـعب كوردسـتان المشروعـة ويتعاملـوا معاملـة ســليمة مــع قضيــة إســتقلال كوردســتان، لــكي نتمكــن في المسـتقبل أن نكـون أكثـر تضامنـا ودعـما فيمـا بيننـا، ونبنــي معــا مســتقبلا جميــلا مفعـمـا بالحــب والمــودة.
من جانب آخر يؤكد المؤلف على إننـــا كقيـــادة الكـــورد، نحتـــاج عـــى كافـــة المســـتويات الى مراجعـــة أنفســـنا في طريقـــة التعامـــل مـــع الآخـــر ومـــع الأحـــداث والمســـتجدات، يجـــب أن ننتقد أســـلوب عملنـــا الماضي، وننظـــر للنقـــد كآليـــة تقـــدم العمليـــة السياســـية. يضيف الكاتب بأن مقالات الكتاب سبق و ان كتبت باللغـــة الكورديـــة ونـشــرت في الصحـــف والمجـــلات الكورديـــة، و يشير الى انه في الفــتـرة التـــي كان في الكرنتينـــة فكر أن يســـتفيد مـــن الوقـــت، بل و رأى مــن الـضـروري ترجمتهــا الى اللغــة العربيــة لــكي يكــون القــارئ العــربي أكثــر تعرفــا وتآلفـا للقضيـة الكورديـة المشروعـة، وفي الوقـــت نفســـه يصـــل الى الاعتقاد بـــأن شـــعب كوردســـتان اسوة بالشعوب الاخرى في العالم له الحق المشروع ان تكون له دولته القومية.
يذكر ان المؤلف غفور مخموري كاتب و سياسي كوردي و هو السكرتير العام للأتحاد القومي الديمقراطي الكوردستاني YNDK وعضو سابق في برلمان كوردستان ، أصدر حتى الآن اكثر من 20 كتابا مطبوعا باللغتين الكوردية و العربية .

التصميم الداخلي للكتاب و غلافه للمصمم لقمان رشيدي و يضم (220) صفحة.
مجلة (گوڵان) تهنىء السيد غفور مخموري لتأليفه هذا الكتاب المتميز و تتمنى له الموفقية و بأنتظار المزيد مستقبلا.

لقراءة الكتاب اضغط على الرابط التالي:

https://www.yndk.com/index.php/books/item/565-2020-08-13-18-16-47.html

غەفوور مەخمووری سكرتێری گشتی YNDK رۆژی ١٠ / ٨ / ٢٠٢٠ لە رێوڕەسمی یادکردنەوەى سەد ساڵەى پەیماننامەى (سیڤەر)دا، کە ئەنستیوتى کورد لە پاریس ئامادەسازى بۆکردبوو، لە شاری (پاریس)ی پایتەختی فەرەنسا بەڕێوەچوو، لە رێگەى ڤیدیۆ کۆنفراسەوە بەشداریکرد و وتارێکى پێشکەشکرد و، رایگەیاند کەوا جێبەجێنەکردنى پەیماننامەی سیڤەر بۆتە هۆكاری ئەوەى كە تا ئێستا رۆژهەڵاتی ناوەڕاست و هەموو ناوچەكە هێمنی و ئارامی بەخۆیەوە نەبینێت و شەڕو خوێنڕشتن درێژەى هەبێت، هەروەها وتى سەربەخۆیى كوردستان فاکتەرى چەسپاندنى ئاشتى و ئاسایش و ئارامییە لە رۆژهەڵاتى ناوەڕاستدا.  ئەمەش دەقى وتارەکەیە :

  بەڕێزان کۆمیتەى رێڤەبەرى سەد ساڵەى پەیماننانەى (سیڤەر) ...
 خوشكانى ئازیز ... برایانى بەڕێز ...
 ئامادەبووانى خۆشەویست ...

  سڵاوى سەرخۆبوون و ئازادیتان لێبێت و، هەموو لایەك بەخێربێن سەرسەرو سەرچاوان.
 بەڕێزان ؛ ئەمڕۆ ئێمە کە هەموومان لێرەدا لە كۆبوونەوەیەكی زۆر گرنگ و لە رۆژێكی دیرۆكیدا كۆبووینەتەوە، بۆئەوەی باس لە پەیماننامەیەكی گرنگ بكەین كە پەیوەست بووە بەداهاتووی كورد، ئەویش پەیماننامەى سیڤەرە، ئێستا و دواى سەد ساڵ بە هیواوە سەیرى ئەو پەیماننامەیە دەکەین، ئەمڕۆ (10 / 8 / 2020) ؛ رۆژێكی گرنگ و دیرۆكییە لە مێژووى گەلى کوردستاندا ، سەد ساڵ بەسەر پەیماننامەى (سیڤەر)دا تێپەڕدەبێت، لە رۆژێکى وەکو ئەمڕۆدا لە (10 / 8 / 1920) پەیماننامەى سیڤەر مۆڕکرا، لەو پەیماننامەیدا کۆمەڵێ ماف كە پەیوەست بوو بەداهاتووی كورد بۆ گەلى کوردستان دیارکرا، بەڵام دواتر پەیماننامەکە وەک خۆى جێبەجێ نەکرا و خەونەکانى گەلى کوردستانیش لەباربران، لەگەڵ ئەوەشدا تا ئێستا و دواى سەد ساڵ کورد بە هیواوە سەیرى ئەو پەیماننامەیە دەکەن.
 وەكو خۆتان دەزانن گەلی كوردستان بەدرێژایی مێژوو لە خەبات و تێكۆشان و بەرخوداندا بووە لەپێناو وەدەستهێنانی مافە ڕەواكانی خۆیدا و، گەورەترین زوڵمی مێژووییش كە لە گەلی كورد كرابێت رێكەوتننامەى (سایكس - پیكۆ) بووە لە ساڵی 1916دا، دواى ئەوەى کوردستان لە ئەنجامى شەڕى چاڵدێران دابەشى سەر هەردوو ئیمراتۆریەتى عوسمانى و سەفەوەى کرا، جارێكی دیكە و سەرلەنوێ کوردستان بەپێى رێکەوتننامەى (سایکس - پیکۆ) دابەشی سەر (عێراق و توركیاو سوریاو ئێران) کرا، راستە ئەو ریکەوتننامەیە بۆ داڕشتنەوەی نەخشەی سیاسی ئەو ناوچەیە بوو، بەڵام لەهەمان کاتدا زوڵمیکى گەورەش بوو لە کورد و گەلى کوردستان کرا، بێگومان گەلی كوردستان هەر لەسەرەتاوە رێكەوتننامەی (سایكس - پیكۆ)ی ڕەتكردەوەو پێی ڕازی نەبوو.
 دوای چوار ساڵ لە رێكەوتننامەی (سایكس - پیكۆ) هەوڵێك هاتە ئاراوە كە ئەویش پەیماننامەی (سیڤەر) بوو، بەپێی ئەو پەیماننامەیە لە بەندەكانی (62 و 63 و 64) كۆمەڵێ ماف بۆ گەلی كوردستان دیاركرابوو، بەپێی ئەو پەیماننامەیە دەبوایە دوای ساڵێك گەلى كوردستان وەك هەر گەلێکى دیکەى ناوچەکە خۆى خۆى بەڕێوەببات و، دواتر هەوڵبدات لەسەر خاکى خۆى بینای وڵاتی خۆی بكات و، هەوڵ بدات وەك چۆن لە رابردوودا رۆڵێكی كارای هەبووە لە بیناكردنی شارستانییەتی ناوچەكەدا بەهەمان شێوە لەداهاتوودا رۆڵێكى كارا ببینێت لە بیناكردنی كۆمەڵگایەكی مۆدێرن و پێشكەوتوو لە رۆژهەڵاتی ناوەڕاستدا، بەڵام بەداخەوە ئەو پەیماننامەیە جێبەجێنەكرا و، ئەوە بوو پەیماننامەی لۆزان كە لەساڵی 1923 هاتە پێشەوە ئەو پەیماننامەیە ئەو خەونەی كوردی لەباربرد کە لە سیڤەر بەرنامەڕێژى بۆ کرابوو، جارێكی دیكە لە (لۆزان) زوڵم لە گەلی كوردستان كرایەوە، كەمالییەكان زوڵمێكی گەورەیان لەگەلی كوردستان كرد كە مافی رەوای گەلی كوردستانیان نەدا و، نەیانهێشت ویلایەتی موسڵ خۆبەڕێوەبەری رابگەیەنێ، دواتر کە ویلایەتی موسڵ لەساڵی 1925 كە بەعێراقی عەرەبییەوە لكێندرا جارێكی دیكە ئەو خەونەی كورد لەباربرا.
  ئێمە ئەگەر تێبینی بكەین لەماوەی سەد ساڵی رابردوودا، كە پەیماننامەی سیڤەر جێبەجێنەكرا، ئەوە بۆتە هۆكاری ئەوەى كە تا ئێستا رۆژهەڵاتی ناوەڕاست و هەموو ناوچەكە هێمنی و ئارامی بەخۆیەوە نەبینێت و شەڕو خوێنڕشتن لە رۆژهەڵاتى ناڤیندا درێژەى هەبێت، جێبەجێکردنى پەیماننامەى (سیڤەر) فاکتەرێکى سەرەکییە بۆ چەسپاندنى ئاشتى و هێمنى و ئارامى لە رۆژهەڵاتى ناڤین و بگرە جیهانیشدا، بێگومان پێویستە هەموو لایەک ئەو راستییە بزانن کە دامەزراندنی دەوڵەتی كوردستان و گەیشتنی گەلی كوردستان بەمافە رەواكانی خۆی گەورەترین فاكتەری چەسپاندنی هێمنی و ئارامییە لە رۆژهەڵاتی ناوەڕاست و، تەنها و تەنها لەو رێگەیەوە دەتوانرێ ئەو هێمنی و ئارامییەی كە كۆمەڵگای نێودەوڵەتی دەیخوازێت لەرۆژهەڵاتی ناوەڕاستدا بچەسپێ وەدەست بهێنرێت، واتە دامەزراندنی دەوڵەتی كوردستان فاکتەرى چەسپاندنى ئاشتى و ئارامییە لە رۆژهەڵاتى ناوەڕاستدا.
 ئەگەر ئێمە تێبینی بكەین دەبینین كە ئەو پەیماننامە گرنگەی سیڤەر جێبەجێ نەكراوە، ئەوە هۆکارى سەرەکى بووە کە ناوچەى رۆژهەڵاتى ناڤین هێمنی و ئارامی بەخۆیەوە نەبینێت، ئەمەش شەرمەزارییەكی گەورەیە بۆ تەواوی كۆمەڵگای نێودەوڵەتی كە ئەمڕۆ نەتەوەیەكی زیاتر لە (50) ملیۆن مرۆڤ لەهەموو مافێكی خۆی بێبەشكراوە و، لەلایەن چوار دەوڵەتی ناوچەكە (عێراق و ئێران و تورکیا و سوریا) دەچەوسێندرێتەوەو مافەكانی پێشێل دەکرێت، بۆیە لەسەر كۆمەڵگای نێودەوڵەتى پێویستە جارێكی دیكە هەوڵبدات بۆ زیندووكردنەوەو کاراکردنەوەی پەیماننامەی سیڤەر و، هاوكاربێت بۆ ئەوەی دەوڵەتی كوردستان دابمەزرێت.

  ئامادەبووانى بەڕێز ...
  بۆ زیندووکردنەوەو کاراکردنەوەى پەیماننامەى سیڤەر ؛ ئێمە وەكو گەلی كوردستان پێویستیمان بەوە هەیە كە لە داهاتووێكی نزیكدا بۆردێكمان هەبێت و، وەک ئەرکێکى نەتەوەیى و بەپەلە پێویستە (بۆردی كاراكردنەوەی پەیماننامەی سیڤەر) دابمەزرێنین، بۆ ئەوەی بتوانین لە رێگەی ئەو بۆردەوە كاربكەین و جارێكی دیكە ئەو پەیماننامەیە زیندووبكەینەوەو هەوڵبدەین لەو رێگەیەوە داوای مافە رەواكانی خۆمان بكەین، بۆئەمەش پێویستە هەرسێ ماددەی (62 و 63 و 64)ی پەیماننامەی سیڤەر كارا بكەینەوەو بەپێی ئەو ماددانە داوای مافە رەواكانی خۆمان بكەین، لەو پێناوەشدا پێویستە هەموو تاكێكی كوردستان بەو ئاراستەیە كار بكات، لەهەمان کاتدا پێویستە لەسەر ئاستی نێودەوڵەتیش بزاڤێکى خورت بکەین، بۆئەوەى بتوانین كاریگەریمان لەسەر ناوەندە بڕیاربەدەستەکانى ئەمریكا و ئەوروپا و وڵاتانی دیكەش هەبێت، لەم رووەوە رەڤەندی كورد دەتوانێت رۆلێكی كارا بگێرێت، لێرەوە داوا دەكەین کەوا رەڤەندی كورد زیاتر رێكبخرێت و بەشێوەیەکى ئۆرگانیزەکراو ئاڕاستەى كارو خەبات بكرێت، هەروەها لەناوخۆی كوردستانیش پێویستە هەموومان پێكەوە هەوڵبدەین و بەو ئاراستەیە كاربكەین، لەبەرئەوەی زیندووكردنەوەی پەیماننامەى (سیڤەر) هۆكارێكى گرنگ دەبێت بۆ نزیكبوونەوەمان لە گەیشتن بە مافە رەواكانمان.

 جارێكی دیكە هەموو لایەك بەخێربێن سەرسەرو سەرچاوان، ئومێد دەكەين لەچەند ساڵی داهاتوودا ئێمەیش وەكو نەتەوەكانی دیكە بە سەربەخۆیی خۆمان بگەین و ببین بە خاوەنی دەوڵەتی نەتەوەیی خۆمان.
بێتەدى هیواو ئاواتى گەلى کوردستان، بێتەدی كۆماری كوردستان، لەگەڵ رێزو خۆشەویستى دووبارەمان بۆ هەموو لایەک.
بژی كورد.. بژی كوردستان.

 براتان
غەفوور مەخموورى
سکرتێرى گشتیى
 یەکێتى نەتەوەیى دیموکراتى کوردستان YNDK
  ١٠ / ٨ /٢٠٢٠

ئەمڕۆ (10/ 8) یادی 100 ساڵەی پەیمانی (سیڤەر)ە، کە لە (10/ 8/ 1920) لە دوای یەکەم جەنگی جیهانی و دوای سەرکەوتنی دەوڵەتانی هاوپەیمان بەسەر ئەڵمانیا و نەمسا و مەجەر و ئیمپراتۆریەتی عوسمانی، لە شارۆچکەی (سیڤەر)ی نزیک پاریسی پایتەحتی فەرەنسا، لەلایەن کۆمەڵێک دەوڵەت و نوێنەری هەندێک نەتەوە واژۆ کرا، کە پێکهاتبوون لە (بەریتانیا، فەرەنسا، ئیتالیا، ژاپۆن، ئەرمەنستان، بەلجیکا، یۆنان، پۆڵەندا، پرتوگاڵ، رۆمانیا، سیبیریا، کرواتیا، سلۆڤینیا، چیکسلۆڤاکیا و تورکیای عوسمانی)، هەورەها ئەمریکاش وەک چاودێر تێیدا بەشدار بوو، جگە لەمانە، فەیسەڵی کوڕی حوسێن، وەک نوێنەری عەرەبەکانی حیجاز و ژەنەراڵ شەریف پاشای خەندان وەک نوێنەری کورد، بە ئامادەکردنی راپۆرتێک لەسەر بارودۆخی نەتەوەکەیان و دەستەبەرکردنی مافەکانیان، بەشدار بوون.

ئەم پەیماننامەیە لە ( 10/اب/1920 ) لە نێوان دەوڵەتی عوسمانی و دەوڵەتە هاوپەیمانەكانی سەركەوتووی جەنگ و بە نوێنەرایەتی هەندێ دەوڵەتی تر مۆركرا،وە لە كاتی بەستنی ئەم پەیمانە كوردستان بەدوو پارچەیی مابووە وە كوردستانی دەوڵەتی عوسمانی و كوردستانی ئێران .

گرنگیی پەیمانی سیڤەر بۆ کورد لەوە دابوو، کە بۆ یەکەم جار بوو مافی چارەنووسی نەتەوەی کورد لە پەیمانێکی نێودەوڵەتیدا دیاری بکات، کە بەپێی هەندێ لە توێژەران، تا ئێستاش بە هیچ بڕیارێک بە فەرمی هەڵنەوەشاوەتەوە، ئەگەرچی دواتر (پەیمانی لۆزان، کە لە 24/ 7/ 1923، کە لە سویسرا لە ئەنجامی خۆدزینەوە لە جێبەجێکردنی بڕیارەکانی سیڤەر و گەلەکۆمەکی دژ بە مافەکانی نەتەوەی کورد بەسترا)، کرا بە جێگرەوەی پەیمانی نێودەوڵەتیی سیڤەر.

ئەم پەیمانە لە ( 13 ) بەش و ( 433 ) بەند پێك هاتبوو،لەبەشی ( 3) و بەندی ( 62–63 –64 )ڕاستەوخۆ باسی كورد و ئایندەی كوردەكانی كوردستانی كردبوو،وە بەیەكەم پەیماننامەی نێودەوڵەتی دادەنرێ كەبەم شێوەیە باسی كورد بكات،هەرچەندە لە بەندەكانی تریش بەشێوەیەكی ناڕاستەوخۆ باسی كورد دەكات بەڵام بێ ئەوەی ناوی كورد بهێنێ . 

دەقی ئەو بەندانەی پەیمـانی سیـڤەر كەتایبەت بوون بەكورد :-

62–دەبێت كۆمسیۆنی ئەستەمبۆل بەفەرمی دەست نیشانی سێ نوێنەر بكات،ئەوانیش نوێنەری بریتانی و فەرەنسی و ئیتالی بن، هەتا شەش مانگ دوای مۆركردنی ئەو پەیماننامەیە ئەو كۆمسیۆنە دەبێت نەخشەیەك بۆ خودمختاری هەرێمی ئەو مەڵبەندانە پێشكەش بكات كە زۆربەی دانیشتووانەكانی كوردن،لە ڕۆژهەڵاتی چەمی فورات و خوارووی ئەرمەنستان سنوریان بۆ دەست نیشان بكرێت .

ئەگەر كۆمسیۆن نەیتووانی بڕیاری یەكلاكەرەوە بدات ئەوا نوێنەرەكان دەتووانن لەگەڵ حكومەتەكانیان تاوتوێی ئەم بابەتە بكەن،وەباسیش لەپاراستنی مافی ئاشوریەكان و كەمەنەتەوەكانی تر كراوە .

63–حكومەتی توركیا مل كەچ دەبێت بۆهەر بڕیارێك كەوا كۆمسیۆن دەری بكات كە لەبەندی ( 62 ) باس كراوە،دەبێت لەماوەی سێ مانگ دا لەدوای دەركردنی بڕیارەكە جێ بەجێیان بكات .

64–تا ساڵێك لە پاش ئیمزاكردنی ئەو پەیماننامە ئەگەر كوردەكانی دانیشتووی چەمی فورات و خوارووی ئەرمەنستان جیانەبنەوە لە توركیا دەبێ ئەنجومەنی كۆمەڵی نەتەوەكان ڕابگەیەنن وە ئەنجومەنیش دانی بەوەدانا كەئەوان دەتوانن سەربەخۆ بژین ئەوا حكومەتی توركیا دەبێ ڕازی بێت و دەست بەرداری ئەو ناوچانە بێت،وە دەبێت توركیا دەست لەمافی ئەو ناوچانە هەڵبگرێت،مافەكانیش بەگوێرەی ڕێكەوتنی هاوپەیمانان و توركیا دەبێت،كوردەكانی ویلایەتی موسڵیش ئەگەر خوازیاری جیابوونەوەن بەویستی خۆیان ئەوا هاوپەیمانان هیچ ڕێگریەك ناكەن بچنە پاڵ حكومەتە كوردیەكەوە .

ئەوەی تێبینی دەكرێ لەبەندەكانی ئەو پەیماننامە سەرەتا ئاماژەكردنێكە بەحوكمی زاتی تەنها بۆ كوردەكانی باكوور نەوەك بۆ هەموو كوردەكانی دەوڵەتی عوسمانی و دەوڵەتی ئێران،ئەوەش بەئاشكرا شەرعیەت دانە بە دابەشكردنی كوردستان وە لەدوای جەنگیش بەئاشكرا دەركەوت كەوا چۆن مافەڕەواكانی گەلی كورد پێشێل كراوە،وە زیاتر بەشی باشووری كوردستان كەوتۆتە بەر هەڕەشەی داگیركەران،هەر بۆیەش ئەم پەیماننامە بەم شێوەیە بەستراوە چونكە بەرژەوەندیەكانی بریتانیا لە بوونی نەوت لە ویلایەتی موسڵ وای دەخواست .