Print this page

غەفوور مەخموورى لە رێوڕەسمێکدا (2) کتێبى نوێى خۆى دەناسێنێ و پێشکەشى خوێنەرانى دەکات

شباط/فبراير 19, 2021
غەفوور مەخمووری : پێویستە هەموو لایەکمان هاوکاربین بۆئەوەى شوێنەوارى دوو ئیدارەیى لە کوردستان نەهێلین و حکومەتى کوردستان بکەینە حکومەتێکى بەهێزو مۆدێرن بۆ هەموو خەڵکى کوردستان.
غەفوور مەخمووری : پێویستە حکومەتى کوردستان بەرنامەى هەبێت بۆ بەرپاکردنى شۆڕشێکى رۆشنبیری واتە شۆڕشى خوێندنەوەو نووسین، بۆ بنیاتنانەوەى رۆحیەت و زهنییەتى تاکى کوردستانى.
میدیا - هەولێر:
پاشنیوەڕۆى ڕۆژى 18 / 2 / 2021 لە شارى هەولێر، غەفوور مەخمووری سكرتێری گشتیی YNDK لەلایەن (کتێبخانەى ئاشتى) میوانداری كرا و, لە رێوڕەسمەکەدا (2) کتێبى چاپکراوى خۆى ناساندو پێشكەشى ئامادەبووانى كرد.
پاشنیوەڕۆى ڕۆژى پێنجشەممە لە شارى هەولێر، غەفوور مەخمووری سكرتێری گشتیی یەكێتی نەتەوەیی دیموكراتی كوردستان YNDK لەلایەن (کتێبخانەى ئاشتى) میوانداری كراو, بە ئامادەبوونی ژمارەیەكی زۆری كەسایەتی سياسى و ئەكادیمی و نووسەرو رۆشنبیرو رۆژنامەڤان رێوڕەسمێکى بۆ ناساندن و خستنەڕوو و واژۆکردنى (2) کتێبى نوێى بۆ رێکخرا, لەسەرەتاى رێورەسمەکەدا نووسەرو رۆماننووس بەڕێز سابیر رەشید بەناوى کتێبخانەى ئاشتى بەخێرهاتنی ئامادەبووانی كردو, باسی لە گرنگی رۆڵى غەفوور مەخمووری لە بوارى نووسین و رۆشنبیرى کوردستان كرد, ئنجا مەخمووری وێڕای بەخێرهاتنكردنی میوانان خۆشحاڵی خۆی بۆ ئەو میواندارییە و ئامادەبوونی میوانان دەربڕی و سوپاسی کتێبخانەى ئاشتى كرد بۆ رێكخستنی ئەو دیدارە لەگەڵ ئامادەبووان, دواتر کورتەیەکى سەبارەت بە ناساندن و ناوەڕۆکى کتێبەکان پێشکەشکرد و، وتى : (ئەمڕۆ دوو کتێبى نوێم کە تازە چاپکراون پێشکەشى ئێوەى بەڕێزى دەکەم، کتێبى یەکەم بە -هەگبەى مەخموورى- بریتییە لە کۆى بەرهەمە ئەدەبى و رۆشنبیرییەکانم کەوا لە سەردەمى جیاجا نووسراون بوارەکانى لێکۆڵینەوەى ئەدەبى و رۆشنبیرى و فۆلکلۆرى و فەلسەفە دەگرنە خۆ، هەروەها کتێبى دووەمم -بصراحة- گوڵبژێرێکى چاوپێکەوتن و دیدارە رۆژنامەوانییەکانمە کەوا بۆ رۆژنامەو گۆڤارو دەزگاکانى راگەیاندنى ناوخۆ و عەرەبى و بیانى دواوم، دەتوانم بڵێم ئەم کتێبەم خوێندنەوەیەکى سەردەمیانە بۆ واقیعى سیاسى کوردستان لە سى ساڵى رابردوودا، لەم کتێبەدا باسم لە کێشەو گرفتە سیاسییەکانى کوردستان کردووەو چارەسەرى گرفتەکانیشم خستۆتەڕوو.)، هەروەها باسى لەوە کرد کەوا کتێبى (بصراحة) بە زمانى عەرەبییە و، کتێبەکە زیاتر ئاراستەیە بۆ ناوەندى عەرەبى بۆئەوەى زیاتر ئاشناى پرسى گەلى کوردستان بن، ئاماژەى بەوەشدا کەوا پێویستە ناوەندى عەرەبى ئەو راستییە بزانن کە چارەسەرى بنەڕەتى پرسى گەلى کوردستان تەنها سەربەخۆیى کوردستانە و، وتى: ( دەتوانم بڵێم لەم کتێبەدا هەوڵمداوە دوو پرسیار بوروژێنم کە ئێمە کێین ؟ و چیمان دەوێت ؟ بۆ ئەمەش وەڵاممان ئەوەیە کەوا ئێمە کوردین و ، وەکو هەر نەتەوەیەکى دیکە مافى نەتەوەیى خۆمان دەوێت .).
لە درێژەى قسەکانیدا مەخموورى وتى : ( ئەو راستییەمان خستۆتەڕوو کەوا ئەزموونی نزیكەی سەد ساڵ بەیەكەوە ژیانمان لەگەڵ عەرەبی عێراق ئەوەی بۆ هەموو لایەك سەلماند كەوا گەلی كوردستان چیتر ناتوانێت لە چوارچێوەی نەخشەی تاشراوی عێراقدا بمێنێتەوە، لەبەرئەوەی دەسەڵاتی عەرەبی سوننەی عێراق لەماوەی نزیكەی هەشتا ساڵی حوكمی خۆیدا ئەوەی توانی لە دژی كورد ئەنجامیدا، لەدوای رووخانی رژێمی بەعسيش لە بەهاری 2003 دا، كە عەرەبی شیعەی عێراق دەسەڵاتیان گرتە دەست، دیارە دەسەڵاتی شیعەش ئەوەی توانیان لە دژایەتی گەلی كوردستان ئەنجامیاندا و بەردەوامن، بۆیە ئەو مێژووە پێماندەڵێت کەوا چارەسەرى بنەڕەتى پرسى گەلى کوردستان تەنها سەربەخۆیى کوردستانە، نەک مانەوە لەگەڵ عێراق.).
مەخموورى لە درێژەى بابەتەکەیدا؛ تیشکى خستە سەر رەوشى سیاسى کوردستان و، وتى: (کوردستان لە رەوشێکى زۆر ناسک و هەستیاردایە و پێویستە هەموو لایەکمان بەرژەوەندى نەتەوەیى و نیشتمانى لەبەرچاو بگرین و کار بکەین بۆ پاراستن و بەهێزکردن و سیستماتیکردنى دەزگاو دامەزراوەکانى کوردستان و، وابکەین حکومەتى کوردستان بکەینە حکومەتێکى بەهێزو مۆدێرن بۆ هەموو خەڵکى کوردستان، هەروەها پێویستە شوێنەوارى دوو ئیدارەیى لە کوردستان نەمێنێت و هێزى پێشمەرگەو دەزگاکانى ئاسایش و پۆلیس و هەواڵگرى یەکبخرێن، ئەمەش وادەکات کەوا حکومەتى کوردستان زیاتر بەهێز بێت.)
مەخموورى لە درێژەى بابەتەکەیدا جەختى کردەوە سەر یەکڕیزى و یەکدەنگى گەلى کوردستانى وەک دەرمانى هەموو دەردەکان وەسفیکرد و، وتى: (تەنهاو تەنها یەکڕیزى و یەکدەنگیمان دەردەکانمان دەرمان دەکەن و لە سەرکەوتن نزیکمان دەکەنەوە، بۆیە لەسەر هەموو لایەکمان پێویستە وەک چۆن دوژمن و داگیرکەرانى کوردستان بە جیاوازى ئایدۆلۆژى و بەرژەوەندییەکانییان لەدژى ئێمە یەکیان گرتووە، پێویستە ئێمەش بۆ پاراستنى خۆمان و بەرگرتن لە هەڕەشەکان یەکبگرین و رەچاوى بەرژەوەندى باڵاى نەتەوەییمان بکەین و جلى تەنگى حزبایەتى فڕێبدەین، پێویستە شاندى کوردستان بە یەکگرتوویى بچێتە بەغداو شوێنانى دیکە، نەک هەر حزبەو بەجیا ، پرسى ئێمە پرسێکى نەتەوەیى و نیشتمانییە پرسى خاک و خەڵکە نەک پرسى ئەم حزب و ئەو حزب. ).
مەخموورى باسى لە گرنگى بۆژاندنەوەى بزاڤى کلتورى لە کوردستان کرد و، وتى : (پێویستە بایەخى تەواو بە بوژاندنەوەى بزاڤى کلتورى لە کوردستان بدرێت و هەوڵبدەین هەستى نەتەوەیى و نیشتمانى بەهێز بکەین و وابکەین کەوا تاکى کوردستانى زیاتر نەتەوە نیشتمانى خۆى خۆش بوێت و بەرەڤانى لێبکات، لەم پێناوەشدا پێویستە حکومەتى کوردستان بەرنامەى هەبێت و هاوکار بێت بۆ بەرپاکردنى شۆڕشێکى رۆشنبیری واتە شۆڕشى خوێندنەوەو نووسین، بۆ بنیاتنانەوەى رۆحیەت و زهنییەتى تاکى کوردستانى، بە باوەڕى من وشیارکردنەوەى تاک و پەیوەستکردنى بە خاک و خۆشویستنى نەتەوە خۆى لە خۆیدا شۆڕشە، ئەمەش دەبێتە فاکتەرێکى بەهێز بۆ بوژاندنەوەى هەستى نەتەوەیى و نیشتمانى و پێگەیاندنى نەوەیەکى رۆشنبیرو تێگەیشتوو لەداهاتوودا.).
شایانی باسە دوای تەواوبوونی كۆڕەكە رێوڕەسمێك بۆ ئیمزاكردنی كتێبەکانى غەفوور مەخمووری سازكرا, مەخمووری كتێبەكانی پێشكەش بە ئامادەبووان كردو بۆی ئیمزاكردن, ئەمەو كۆڕەكە بووە جێی خۆشحاڵی ئامادەبووان.