لە سیدەكان 200 مانگاكە رادەستی خاوەنەكەیان كرانەوە ‌و گاوانەکانیش ئازادكران

تموز/يوليو 28, 2019

دوای دەستبەسەرداگرتنی 200 مانگا و دەستگیركردنی گاوانەکان پاسداری ئێران 200 مانگاكەیان رادەستی خاوەنەكانیان كردەوە ‌و گاوانەکانیشی ئازادكرد، بەڕێوەبەری شارۆچکەی سیدەكانیش دەڵێت "بۆ ئەو كارە پاسدارانی ئێران چوار كلیۆمەتر هاتبوونە پێشەوە".

ئیحسان چەلەبی، بەڕێوەبەری شارۆچکەی سیدەكان بە تۆڕی میدیایی رووداوی راگەیاند: دوای ئەوەی رۆژی شەممە 27-7-2019 لە سنووری (بەربەردی) سنووری شارۆچکەی سیدەكان پاسداری ئێرانی دەستیان بەسەر 200 مانگادا گرت ‌و گاوانەکانیشی دەستگیركرد، ئێوارەی هەمان رۆژ پاش هەوڵ ‌و ماندووبووونی زۆری ئێمە‌ و خەڵكی ناوچەكە "پاسداری ئێرانی 200 مانگاكەیان رادەستی خاوەنەكانیان كردەوە‌ و گاوانەکانیشی ئازاد كردن".

بەڕێوەبەری شارۆچکەی سیدەكان باسی لەوەش كرد، هەرچەندە ئێمە بە بەردەوام رێنمایی خەڵكی دەكەین لە سنووری ئێران نزیكنەبنەوە، بەڵام وەك ئەو گوتی "بۆ ئەو كارە پاسداری ئێرانی چوار كلیۆمەتر هاتبوونە ناو خاڵكی هەرێمی كوردستانەوە دواتر دوو گاوانەکان ‌و مانگاكانیشیان لەگەڵ خۆیان بردبوو".

سیدەكان سەر بەقەزای سۆرانە‌ و 38 كلیۆمەتر لە قەزاكەوە دوورە ‌و 142 كلیۆمەتریش لە سەنتەری پارێزگای هەولێرەوە دوورە.

پێشتر ‌و لەبەرەبەیانی رۆژی یەكشەممە 21-7-2019 زیاتر لە 15 پاسداری ئێرانی لە سنووری گوندی ئاڵانە 420 سەر مەڕ ‌و بزنی دانیشتووانی ناوچەكەیان بردووە، رۆژی دواتریش هەموو ئەو مەڕ‌وماڵاتەكەیان بەبێ‌ كەموكوڕی رادەستی خاوەنەكانیان كردەوە.