له‌ئێران به هۆی ئه‌گه‌ری خۆپیشاندانه‌وه ئینته‌رنێت له چه‌ند پارێزگایه‌ك راده‌گیرێ
سه‌رچاوه: مالپه‌ری نه‌وا
له‌سه‌روبه‌ندی چله‌ی كوژراوانی خۆپیشاندانه‌كانی مانگی رابردووی ئێران، حكومه‌تی ئه‌و وڵاته هێڵه‌كانی ئینته‌رنێتی له چه‌ند پارێزگایه‌ك پچڕاند و په‌یوه‌ندی ته‌له‌فونی چه‌ند پارێزگایه‌كیشی به‌ده‌ره‌وه راگرت.
به‌پێی هه‌واڵێكی ئاژانسی ئیلنا، كه دواتر له سه‌ر ماڵپه‌ڕی ئه‌و ئاژانسه هه‌واڵه‌كه سڕدرایه‌وه، به‌رپرسێكی وه‌زاره‌تی په‌یوه‌ندیه‌كان رایگه‌یاندووه، له‌سه‌ر راسپارده‌ی ناوه‌نده ئه‌منیه‌كان په‌یوه‌ندی ته‌له‌فونی پارێزگاكانی ئه‌لبورز، سنه، زه‌نجان و فارس له‌گه‌ڵ ده‌ره‌وه راگیراوه.
باسی له‌وه‌شكردبوو، پێده‌چێت په‌یوه‌ندی ته‌له‌فونی نێوان چه‌ند پارێزگایه‌كی تریش له‌گه‌ڵ ده‌ره‌وه رابگیرێت.
هاوكات له چه‌ند پارێزگایه‌كیش هێڵه‌كانی ئینته‌رنێت راگیراون یان به رێژه‌یه‌كی زۆر خاوكراونه‌ته‌وه.
ئه‌و هه‌نگاوه له كاتێكدایه چالاكوانانی ناوخۆ و ده‌ره‌وه‌ی ئێران بانگه‌وازیان كردووه، كه رۆژی پێنج شه‌ممه 26 ی كانونی یه‌كه‌م له چله‌ی كوژراوانی خۆپیشاندانه‌كانی مانگی رابردوودا خۆپیشاندان و چالاكی و ناڕه‌زایه‌تی به‌ڕێوه‌بچێت.