میدیا - تارا محەممەد :

هاوڵاتیانی رۆژهەڵاتی كوردستان ئاماژە بۆ ئەوە دەكەن كە بە هۆی سـزا یەك لەدوای یەكەكانی كۆمەڵـگەی نێودەوڵەتی لە بەرامبەر "سەركێشیـیەكانی دەوڵەتی ئێران"، بارودۆخی ئابووری و كۆمەڵایەتی ئێران تێكچووە و لە رۆژهەڵاتی كوردستانیش هەتادێت فشاری ئابووری زەقتر دەبێتەوە.

فەرزاد رۆستەمی گەنجێكی رۆژهەڵاتی كوردستانە و ساڵانێك كۆڵبەری كردووە، ئەو دەڵێت "بوونی قەرەباڵغی مەرزەكانی نێوان كوردسـتانی عێراق و كوردسـتانی ئێران باشترین بەڵگەن كە ژمارەیەكی زۆری نەوجەوانی بێنەوا لە رۆژهەڵاتی كوردستان بە كوێرەوەری بژێوی ژیانیان لە ژێر هەڕەشەی كوشتن و كەمینی پاسـدارەكانی ئێراندا پەیدا دەكەن".
ئەگەر بارودۆخی ئابووری خەڵـكی رۆژهەڵاتی كوردسـتان زۆر خراپ بووە، بەڵام حاڵی خەڵكی هەموو شارەكانی ئێران لە رووی ئابووریـیەوە لە كوردستان چاكتر نیـیە، لە كاتێكدا كە ئابووری ناوچە كوردنشینەكان لەوپەڕی خراپیدایە و رادەی بێكاری لە كوردستان لە (50%)تێدەپەڕێ.
لە سنووری چۆمان كە كەوتۆتە نێوان خاكی رۆژهەڵات و باشووری كوردسـتان كۆمەڵێـك گەنجی رۆژهەڵاتی كوردسـتان كۆبوونەتەوە، ئەوان كۆڵبەرن و هەر یەكەو لە شـارێـكی دوور لە سنوورەكان واتە لە بۆكان و سەردەشت و بانە و مەهابادەوە هاتوون، تاوەكو كۆڵێـكیان بەربكەوێت، یان لەو چەمەی كە هەردوولای كوردسـتانی جیاكردۆتەوە، كەسێـك بكەنە كۆڵ و پبیپەڕێنـنەوە، بەتایبەت ئەوانەی پاسپۆرتیان نییە و بە قاچاخ هاتوچۆ دەكەن.
لەو سنوورە چەندین كەرەسـتەی وەكو پـێداویسـتیـیە كارەبایـیەكان، پـۆشـاك، قوماش، جگەرە و خواردنەوەكانی ئەلكحول رەوانەی ئێران دەكرێن. لەوەتەی نرخی دۆلاریش لە بەرامبەر تەمەنی ئێرانیدا بەرزبۆتەوە، هاوردەكردنی گازوایل و بەنزین و نەوت لە ئێرانەوە بۆ باشووری كوردسـتان پەرەی سەندووە.
فەریبورز حامیدی، كاسبكارێكی رۆژهەڵاتی كوردستانە و دەڵێت "بارودخی ئابووری رۆژهەڵاتی كوردستان بەپێی ئەو تێڕوانینە ئەمنیەتە و هەروەها بێ متمانەیی رژێمی ئێران بە خەڵكی كوردستان كەشێكی پڕ لە ترس و تۆقاندنی لەو ناوچەیەدا دروست كردووە، هەر بۆیە بەو بیانووە رێگەی هیچ جۆرە سەرمایەگوزارییەكی ئابووری و كەلتووری لەو ناوچەیەدا نادات، تەنانەت ئیزنی سەرمایەگوزاری بە سەرمایەدارە كوردەكانیش نادا. هەربۆیە خەڵكی زەحمەتكێش لەوپەڕی هەژاریدا دەژین و ناچارن بۆ بژێوی خۆیان سینگ وەبەر گوللەبدەن و لەسەر سنوورەكان قاچاخی بكەن و دەبینین كە رۆژانە چەندان كەس دەكەونە بەر دەسڕێژی گوللە، یان سەر مین دەكەون، یان چەك هەڵدەگرن، یانیش بۆ شارە گەورەو پیشەسازییەكان كۆچ دەكەن، چونكە ئەو دەسەڵاتە هیچ بیرێكی بۆ لابردنی بێزاری و هەژاری لە كوردستان نەكردۆتەوە". گوتیشی "رۆژهەڵاتی كوردستان بە هەموو شێوەیەك لە ژێر گوشاری جمهووری ئیسلامیدایە و وێڕای ترس لە دەسگیركردن و زوڵم و ستەمی پاسدارەكانی جمهووری ئیسلامی ئێران و بارینی ئەو بەفرە زۆرەش لە ناوچە سنوورییەكان، حاڵی كۆڵبەرانی دوو بەرامبەر سەخت و ناخۆش كردووە، تەنانەت زۆرجار ئەسپەكانیشمان لە ناو بەفر ناتوانن رێ بكەن".
سەبارەت بەو كەلوپەلانەش كە دەیانگوازنەوە گوتی "كێشە تەنیا ئەوە نییە كە شتەكان قەدەخە و قاچاخ بن، بەڵكو بە هۆی زۆریی پارەی گومرگە، بۆیە ئێمە بە كۆڵبەری ئەو كەلوپەلانە لەم سنوور بۆ ئەو سنوور دەگوازینەوە، زیاتریش كەلوپەلەكانمان مەشرووبات و كەلوپەلی كارەبایین كە لە ئێران نرخی گرانە".