:میدیا - تارا محەممەد

بەشێك لە چاودێرانی سیاسی، جیا لەوەی كە خەبات و بەرەنگاری چەكداری لە رۆژهەڵاتی كوردستان بە خەوتوو دەزانن، لایەنە سیاسییەكانی رۆژهەڵاتی كوردستان بە بێدەنگی لە دۆسیەی مافەكانی مرۆڤیش تۆمەتبار دەكەن، ئەوانیش ئەو بێدەنگییە رەتدەكەنەوە و قسەی خۆیان هەیە.

شەماڵ پیران كوردیناتۆری كۆمیتەی ناوەندی پارتی ئازادیی كوردستان، جەخت لەوە دەكاتەوە كە هێزە سیاسییەكانی رۆژهەڵاتی كوردستان بەرامبەر بە پێشێلكردنی مافی كوردانی چوارپارچەی كوردستان بێدەنگ نەبوون و كەم رووداو هەبووە كە هەڵوێستیان نەبووبێ. پیران بەمجۆرە رای خۆی بۆ میدیا دەربڕی "ئێمە وەك پارتی ئازادیی كوردستان هەرگیز بەرامبەر پێشێلكردنی مافی یەك تاكی نەتەوەكەمان لە هەموو كوردستانی گەورەدا بێدەنگ نەبووین و بەردەوام هەڵوێست و راگەیەندراومان هەبووە، دوایین راگەیەندراوی ئێمەش لە سەر كوشتنی كوردەكانی شرناخ بوو، وابزانم زۆربەی هێزەكانی دیكەی رۆژهەڵاتیش راگەیەندراویان هەبووە لەمەڕ رووداوەكانی ئەم دواییەی باكووری كوردستان. هەروەها لە زۆربەی ئەو رێپێوان و كەمپینانەی لە پێوەندی لەگەڵ كوژران، ئێعدام، یان زیندانیكردنی كەس یان كەسانێك پێكهاتبێ بەشداریمان كردووە و لە هیچ رووداوێكی مرۆیی بێدەنگ نەبووین، بەڵام هەتا ئێستا پێم شك نایەت كە هێزە سیاسییەكانی رۆژهەڵاتی كوردستان لە ئاستی نێودەوڵەتیدا هیچ سكاڵایەكیان سەبارەت بە پێشێلكردنی مافەكانی مرۆڤ لە كوردستان بەرز كردبێتەوە، ئەگەر بووبێتیش زۆر كەم بووە و خراوەتە پەراوێزەوە". ئەوەش بە "كەمتەرخەمییەكی زەق لە ئاستی بزووتنەوەكەدا" ناو دەبات و رایوایە بزووتنەوەی كورد لە رۆژهەڵاتی كوردستان، بزووتنەوەیەكی پەرتەوازەیە و دەڵێت "پێوەندی نێوان هێزە سیاسییەكانی رۆژهەڵاتی كوردستان نەك هەر لە سەر بنەمای هاوكاری و یەكتر قبووڵ كردن نییە، بەڵكوو هێندێكیان تەنانەت پێكەوە قسەشیان نییە، بۆیە ئەم وەزعە بێ كاریگەری نەبووە لە هەڵگرتنی ئەمجۆرە هەنگاوانە و تەنانەت لە كارتێكەری دەنگ و هاواری كورد لە ئاستی دەرەوەی وڵات و كۆمەڵگەی نێودەوڵەتیدا، ئەگەر هێزێكی رۆژهەڵاتیش لە لایەن خۆیەوە بە تەنیا ئەوە بكات، بە دڵنیایی كاریگەرییەكی ئەوتۆی نابێ". گوتیشی "ئێمە وەك پارتی ئازادیی كوردستان لە هەموو ئاست و بەستێنێكدا لە دەرەوەی وڵات و لە هەر شوێنێك كە دەنگمانی پێگەیشتبێت، تاوانی دەوڵەتانی داگیركەرمان لە كوردستان لە قاوداوە، بەڵام لەگەڵ ئەوەشدا جەخت لە سەر ئەوە دەكەینەوە كە كورد ناتوانێ دەسكەوتەكان بپارێزێ و مافەكانی وەدی بێنێ، ئەگەر یەكدەنگ و یەكڕیز نەبێ، بزووتنەوەیەك ناتوانێ بە گوێرەی پێویست بەرگری لە نەتەوەكەی بكات، ئەگەر لە سەر بنەمای پاراستنی پڕەنسیپە نەتەوەییەكان رەچاوی تەبایی ریزەكانی نەكات، كە بەداخەوە لە رێزی هێزە سیاسییەكانی رۆژهەڵاتی كوردستاندا ئەوە بەدیی ناكرێ".
هەر لەو بارەیەوە عەلی زیرەك ئەندامی سەركردایەتی پارتی سەربەستی كوردستان، دەڵێت "ئێمە بێدەنگ نین و هیچ لایەنێكی ناو گۆڕەپانەكەش بێدەنگ نین. لەراستیدا ئەركی نەتەوەیی ئێمە بووەتە دەنگ هەڵبڕین، بەڵام جیهان دەزانێ‌ دۆسیەی مافەكانی مرۆڤ دۆسیەیەكی گرنگ و لە هەمانكاتیشدا سەبارەت بە ئێران و ئەو ناوچانەش كە كوردی تێدا دەژی، دۆسیەیەكی هەستیار و كپكراو و بایكۆتكراوە، بۆیە لە ئاستی نێودەوڵەتیدا كاری جدی لەسەر ناكرێت، بەرامبەر بەو پێشێلكارییانەی كە رژێمی ئێران دەیكات، چاودێرێكی وەك ئەحمەد شەهید - یان داناوە، كەچی ناتوانێ‌ بڕوات و لە ناو خەڵكی ئێراندا راستەوخۆ كار بكات، واتا هیچ دەسەڵاتێكیان پێنەداوە، تەنیا بەرپرسیارێتییەكی كارتۆنییان پێ سپاردووە".
زیرەك جەخت لەوە دەكاتەوە كە نەتەوەی كورد لە ئاستی نێودەوڵەتیدا "حسێبی مرۆڤی پلە چەندەمی " بۆ دەكرێت و نەبووەتە هاوڵاتی جیهانی و گوتی "ئێمە وەك پارتی سەربەستیی كوردستان هەوڵمان داوە هۆشیاریی نەتەوەیی كوردی بگوازینەوە بۆ ناو ماڵی نەتەوە بەشخوراوەكانی دیكە و لە رێكخراوێكی گەورەی وەك یەكێتیی نەتەوە بندەستەكانی ئێراندا لەگەڵمان كار بكەن و هەڵوێست بگرن، لە سەر پێشێلكارییە بەرین و لە رادەبەدەرەكانی ئێران سەبارەت بە دۆسیەی مافەكانی مرۆڤی نەتەوە بندەست و مافخوراوەكانیش هاودەنگمان بن، لەگەڵ لایەنە كوردییەكانیشدا بە بەردەوامی هەوڵی نزیكبوونەوەمان داوە، كە بتوانین لە چوارچێوەی كۆمەڵەخاڵێكدا و لەئاستێكی بەربڵاودا كار بۆ بەچۆكدا هێنانی رژێم و كار بۆ یەكخستنی ریزەكانمان و دروستكردنی یەكیەتییەك بۆ ماڵی خۆمان بكەین، كە هەمووان پێكەوە لەم بوارەداو لەئۆرگانێكی گەورەتر و پڕ جموجۆڵتر لە جاران كار بكەین". گوتیشی "من لەو باوەڕەدا نیم كە لایەنە كوردییەكان سەبارەت بە پێشێلكاریی دۆسیەی مافەكانی مرۆڤ بێدەنگییان هەڵبژارد بێت، بەڵام بارودۆخی ئێستا هەموومانی قەرزاری شۆڕش و گەل و تەنانەت خۆشمان كردووە، تەنانەت نەمانتوانیوە یەكێتییەكی رۆحی لەناو خۆماندا بۆ بەرەنگاربوونەوەی بەكۆمەڵ دروست بكەین و ئەمەش بە حەقیقەت فشار و هاوكاریی خەڵكیشی دەوێ‌ كە ئەو رێكخستنە گەورەیە بكرێت". ئاماژەی بەوەش دا كە پارتەكەیان كاریان بۆ ئەوەكردووە مافی مرۆڤی كورد و ئازادییە زەوتكراوەكانی بە ناوەندە جیهانییەكانی وەك لیبراڵ ئەنتەرناشناڵ و زۆر شوێنی گەورەی دیكە بناسێنن.