میدیا – كارزان خەمگین

بڕیاری كردنەوەی بەشی كۆلێژی پەروەردە لەمەخموور بووە هۆی دڵخۆشی خەڵكی دەڤەرەكە، بەڵام لەناكاو بڕیاری راگرتنی ئەو دووبەشە لەلایەن وەزیری خوێندنی باڵاو توێژینەوەی زانستی حكومەتی كوردستان درا، ئەمەش گلەییەكی زۆری لێكەوتەوە. قایمقامی مەخمووریش دەڵێت "وەزیر چەند بیانوویەكی دۆزیوەتەوەو هۆكارەكەی دەخاتە ئەستۆی سەرۆكایەتی زانكۆی سەلاحەدینو سەرۆكایەتی زانكۆی سەلاحەدینیش رەتی دەكاتەوە، لەكاتێكدا هۆكارەكان قابیلی چارەسەركردنن".

شێخ موتەڵیب محەممەد سلێمان تەمەنی 40 ساڵە و وەك دانیشتوویەكی مەخموور دەڵێت "كردنەوەی كۆلێژو بەڵێندان بە خەڵكی مەخموور زۆر بەختەوەری كردین، كە كۆلێژێك لە مەخموورو بكرێتەوەو چیتر گەنجانمان بەخاوخێزانەوە سەرگەردان نەبن لەنێوان هەولێرو مەخموور، بەكردنەوەی ئەو كۆلێژەش سەرەتا زۆر خۆشحاڵ بووین، بەڵام دووبارە حكومەتی هەرێمی كوردستان بە نەكردنەوەی ئەو كۆلێژە بێئومێدییەكی زۆری لەلای خەڵكی مەخموور دروستكرد، بەم كارە تووشی رەشبینییەكی زۆری كردووین بە بەڵێندانی بەرپرسان بووەتە هۆی ئەوەش خەڵكی مەخموور بڕوایان بەم حكومەتە نەمێنێت، چونكە حكومەت خۆی وادەكات خەڵك متمانەی پێ نەبێت، بەڵێن دەدەن و دواتر جێبەجێی ناكەن". گوتیشی "داواكارین حكومەت لەگەڵمان راستگۆ بێتو ئێمەش كوردینو سەر بەهەولێرین، چیتر قسەو قسەڵۆكمان قبووڵ نییە كە ئێمە سەر بە موسڵین یان دوو ئیدارەیین".
نازم رەشیدی تەمەن 34 ساڵیش دەڵێت "حەز دەكەین كۆلێژێك لە مەخموور بكرێتەوە، بۆ ئەوەی گەنجانمان ئەوەندە لە ماڵانو لەشارەكان نەمێننەوە، حەز دەكەین چاوێكیش بە شارۆچكەی مەخمووردا بخشێننەوەو داواكارین ئەو كۆلێژەمان بۆ بكەنەوە.
نازم بە پرسیارێك درێژە بە قسەكانی دەدات و دەڵێت "بۆچی كۆلێژەكەیان كردەوەو دواتر بۆچی دایانخســــــــت؟ ئەمە وایكردووە باوەڕم بەم حكومەتە نەماوە لەبەر ئەوەی بەڵێنمان پێ دەدەنو جێبەجێی ناكەن، ئێمە وەك مەخموور سەربە هەولێرین، قایمقام و بەڕێوەبەرانی فەرمانگەكان سەربە هەولێرن، ئیتر تاكەی ئێمە بچەوسێنرێینەوە؟ تەنیا وەزیری خوێندنی باڵا مابوو غەدرمان لێ بكات، ئەویش كردی بەداخستنی ئەو كۆلێژەی بڕیار بوو لە مەخموور بكرێتەوە، بۆیە داواكارین چاوێك بە بڕیارەكەیدا بخشێنێتەوەو پەشیمان ببێتەوە".
یوسف عەلی تەمەن 43 ساڵ، وەك چالاكوانێكی مەدەنی ئەو بڕیارەی وەزیری خوێندنی باڵا بۆ هەڵوەشاندنەوەی كۆلێژەكە بڕیار بوو بۆ هەردوو زمانی كوردی و عەرەبی بكرێتەوە، بە "بڕیارێكی نابەجێ" ناوی برد و گوتی "خەڵكێكی زۆر خۆیان ئامادە كردبوو دوای كردنەوەی ئەو كۆلێژە، لە هەولێر بگەڕێنەوە بۆ مەخموور، لەهەمانكاتدا بازاڕی ناوچەكەیشی دەبووژاندەوە، بەڵام نازانم چی وای لە جەنابی وەزیر كرد، بڕیاری هەڵوەشانەوە بدات، كە كاریگەری لەسەر مەعنەویاتی خەڵكەكە هەبوو". گوتیشی "مەخموور ناوچەیەكی كشتوكاڵییە و دەبێت كۆلێژی كشتوكاڵی لەناوچەیەكی وەك مەخموور بێت، نەك لەناو شارو پایتەخت بێت، پێویستە حكومەت بەخۆیدا بچێتەوەو ئەو كۆلێژەی لە پایتەختە، بهێنرێتە مەخموور كە باشترین ناوچەی كشتوكاڵییە".
هێرش مەجید، گۆڵچی یانەی وەرزشی مەخموورە و ئەویش دەڵێت "سەرەتا زۆر خۆشحاڵ بووین بە كردنەوەی ئەو كۆلێژە، بەڵام ئێستا راوەستاوە و زۆر ناخۆشە لای ئێمە، بەنیاز بووین دوای كردنەوەی ئەو كۆلێژە، داوا بكەین كۆلێژێكی وەرزشیش بكەنەوە، بەڵام بەداخستنی ئەو كۆلێژەش هۆكارێكی دیكە دروستدەبێت بۆ ئەوەی خەڵك لێرە بار بكەنو روو لە هەولێر بكەن، لەبەر ئەوەی منداڵەكانیان لە هەولێر دەخوێنن و لە تواناشیاندا نییە هەموو رۆژێك هاتوچۆ بكەن".
ماجید محەممەدی تەمەن 37 ساڵیش كە نووسەرێكی دانیشتووی مەخموورە، نیگەرانی خۆی لە داخستنی كۆلێژەكە دەردەبڕێت و هاوكات دەڵێت "پێموایە ئێمە وەك گەنجانی مەخموور دەتوانین بە كۆكردنەوەی واژۆ، داواكاریمان بخەینە بەردەم دەسەڵات بۆ ئەوەی ئەو كۆلێژە بكرێتەوەو ئەم هەنگاوەش كارێكی چاكە". گوتیشی "خەڵك بێ ئومێد نەبووە، بەڵام ئەو بڕیارە بشێوییەكی دروستكردووە". جەختی لەوەش كردەوە كە ئەگەر ئەو كۆلێژە لە مەخموور بكرێتەوە، دەڤەرەكە دەبووژێنێتەوە و لە رووی زانستی و ئابووری و هەلی كاریشەوە مەخموور و دەوروبەری گەشە دەكات.
لە لای خۆیەوە ئیبراهیم شێخەڵڵا قایمقامی مەخموور، بە میدیای رایگەیاند، كە پشتیوانییەكی زۆریان لە كردنەوەی كۆلێژەكە كردووە، سوپاسی سەرۆكایەتی زانكۆی سەلاحەدینیشی كرد كە تا ئەو قۆناغە پشتگیرییان كردوون و پڕۆژەكەیان بەرەو پێشەوە برد، بەڵام لە ناكاو رووبەڕووی بڕیارێكی وەزارەتی خوێندنی باڵا بوونەتەوە. لەوبارەیەوەش گوتی "بەچەند بیانوویەك بڕیار دراوە ئەو كۆلێژانە لەمەخموور نەكرێنەوە، ئەوەش تووشی سەرسوڕمانی كردین، هەفتەی رابردووش نامەیەكی وەزیری خوێندنی باڵام پێگەیشت كە باس لە هۆكارەكانی نەكردنەوەی ئەو دوو بەشە دەكات كە سەرۆكایەتی زانكۆی سەلاحەدین وەكو پێویست پڕۆفایلی ئەو زانكۆیەی ئامادە نەكردووە و لە رووی بیناو دابینكردنی مامۆستا ئامادەكاری نەكردووە، لەهەمانكاتدا 200 مامۆستای كۆلێژی پەروەردەش هەڕەشەی ئەوەیانكردووە، ئەگەر بەبێ ویستی خۆیان رەوانەی مەخموور بكرێن، ئەوا ماندەگرن لە دەوام، هۆكارێكی دیكەشیان ئەوە بووە كە گوایە كردنەوەی ئەو كۆلێژانە لە مەخموور وەك ناوچەیەكی دابڕێنراو ئەوا كێشەیەكی سیاسی گەورەی لێ دروست دەبێت"، گوتیشی "نامەیەكی سەرۆكایەتی زانكۆی سەلاحەدینشم بەدەست گەیشتووە، هەموو ئەو هۆیانەی رەتكردۆتەوە كە خەتا لەوان بێت، ئەوان هەموو ئامادەكارییان كردووەو مامۆستاش دابینكراوە لەگەڵ سەرۆكی بەش، سەبارەت بەبینایە ئەویشمان دابینكردووە، وەك چارەسەرێك تا ئەو بیناو ستاف و پێداویستییەكان تەواو دەبن. لەشنگال و خانەقینیش كۆلێژو پەیمانگە كراوەتەوە، هیچ كێشەیەكی سیاسی لەكردنەوەی ئەو دووبەشە لەمەخموور نابینین، ئێمەش لەسەر روونكردنەوەكەی زانكۆی سەلاحەدینیش هاوڕاین و پێویستە دووبارە وەزیری خوێندنی باڵا بە بڕیارەكەیدا بچێتەوە، چونكە ئەو كێشانەی باسی كردووە، هەمووی قابیلی چارەسەركردننو بەشێكیش لەو كێشانە چارەسەركراون".