میدیا – ئازاد مەحموود:

دوای ئەوەی 207 رووفاتی گۆڕەبەكۆمەڵەكانی دیوانیە گەیشتەوە كوردستان، وەزارەتی كاروباری شەهیدان بە هاوكاری وەزارەتی تەندروستی فیدراڵ ، كار بۆ هێنانەوەی 527 رووفاتی دیكەی ئەو گۆڕەبەكۆمەڵانە دەكەن.
لەوبارەیەوە ئارام ئەحمەد وەزیری  كاروباری شەهیدان و ئەنفراكراوەكان بە میدیای راگەیاند" دوای ئەوەی لەچەند مانگی رابردوو رووفاتی 207  دیوانیە گەیشتەوە هەرێمی كوردستان و نموونەی  سامپڵی ئیسكی وەرگیرا و بۆناشتن  ئامادەكرا ، لەكاتی ئێستا 527 رووفاتی دیكە  لەلایەن وەزارەتی تەندروستی فیراڵەوە ئامادەباشی  بۆ دەكرێت تاكو  بەزووترین كات بگەرێنەوە كوردستان" .
گوتیشی" پێشبینی دەكەین لەماوەی كەمی داهاتوو وەزارەتی تەندروستی فیدراڵ ئەوكارە ئەنجام بدات و رەوانەی هەولێر بكرێتەوە، بۆئەوەی بەیەكەوە كە ژمارەیان دەگاتە 734 رووفات لەمەراسیمیكدا لەزێدی خۆیان بەهاوكاری ئیدارە گەرمیان  و كەسوكاری ئەو رووفاتانە  و بەخاك بسپێردرێن، بۆ ئەومەبەستە لە سنوری قەزای چەمچەماڵ كار بۆ ئامادەكردنی گۆرستان بۆ ئەو رووفاتانە  دەكرێت".
هاوكات فوئاد عوسمان بەرێوەبەری راگەیاندنی وەزارەتی ناوبراو گوتی" جگە لە گۆرەبەكۆمەڵەكانی مەهاری یەك و مەهاری دووی دیوانیە، ژمارەیەكی  لە گۆری بەكۆمەڵ لە سنوری پارێزگا دیوانیە هەیە و تایبەت بە قوربانیانی خەڵكی كوردستان ، بۆیە وەفدەی وەزارەتی كاروباری شەهیدان داوای لە كەسانی شارەزای ئەو پارێزگایە كردووە كە روپێوێكەی ناوچەكە بكەن بۆ دۆزینەوەی ئەو گۆرە بە كۆمەڵانە".
شایەنی باسە لەمانگی هەشتی ساڵی رابردوو ، دوو گۆڕی بەكۆمەڵ لە سنوری پارێزگای دیوانیە دۆزرایەوە كە ژمارەیان دەگاتە 730 كەس و هەموویان كوردبوون  ، دوای هەڵدانەوەیان لەماوەی رابردوو 207 رووفات وەك قۆناغی یەكەم  گەیشتەوە كوردستان.